Agim Shahini, kryetar i Aleancës Kosovare të Bizneseve, ka kritikuar Qeverinë e Kosovës për mënyrën se si po përballet me krizën ekonomike. Sipas tij, masat e marra deri tani kanë rënduar bizneset dhe jetën e qytetarëve, pa ofruar zgjidhje konkrete për konsumatorët.
Në një intervistë për Ekonomia Online, Shahini deklaroi se shteti ka mekanizma të shumtë në dispozicion, por Qeveria ka zgjedhur të ndërhyjë duke limituar fitimet e bizneseve, ndërkohë që nuk ka bërë asgjë për mbrojtjen e konsumatorit. Ai kërkoi hapa konkretë për krizën dhe vuri në dukje se projektligji për çmimet tavan, i cili është në diskutim, ka mangësi të mëdha. Ky projekt nuk duhet të jetë udhërrëfyes i zhvillimit ekonomik, por vetëm kontrollues në raste jashtëzakonshme.
Shahini nënvizoi se Qeveria nuk ka ulur TVSH-në, nuk ka hequr akcizën në derivate dhe ka shtrenjtuar energjinë elektrike, duke e bërë jetën më të vështirë për qytetarët kosovarë.
Kreu i Aleancës Kosovare të Bizneseve theksoi mungesën e një strategjie të qartë për prodhimin vendor. Prodhuesit vendorë janë në gjendje të rëndë, të pambështetur dhe shpesh të nënvlerësuar nga konsumatorët. AKB-ja ka mbështetur vazhdimisht ekonominë vendore dhe ka kërkuar politika zhvillimore.