Deputeti shqiptar në Kuvendin e Serbisë, Shaip Kamberi, ka reaguar ndaj qëndrimeve të ministres serbe Snezhana Paunoviq në një intervistë për median serbe "Kurir". Kamberi vlerëson se deklarata për mbështetjen e spastrimit etnik në Kosovë përbën një mesazh shqetësues për komunitetin shqiptar në Luginën e Preshevës.
Sipas Kamberit, shqetësimi buron nga kompetencat institucionale që mban ministrja Paunoviq. Duke qenë se ajo mbikëqyr administratën publike, regjistrat e qytetarëve dhe regjistrat zgjedhorë, deputeti shqiptar paralajmëron se kjo pozitë mund të shfrytëzohet për të ndikuar në përbërjen demografike të zonës ose për të cenuar statusin e qytetarëve.
Kamberi theksoi se heshtja e qeverisë serbe, përpjekjet e presidentit për të relativizuar këtë deklaratë dhe roli i zëvendëskryeministrit, njëkohësisht ministër i Punëve të Brendshme, e shtojnë pasigurinë. Ai deklaroi se shqiptarët e Luginës së Preshevës nuk do të dorëzohen përballë këtyre kërcënimeve, duke u zotuar se beteja për të drejtat e tyre do të vijojë pavarësisht politikave të ndjekura nga Beogradi.