Këngëtarja e njohur kolumbiane, Shakira, ka publikuar një mesazh emocional në rrjetet sociale për të shprehur solidaritetin e saj me vendlindjen, pas tërmetit të fuqishëm që goditi rajonin perëndimor të Kolumbisë. Lëkundjet sizmike, me një magnitudë prej 7.4 ballë, kanë shkaktuar pasoja të rënda, ku deri në këto momente raportohen 111 viktima dhe 87 persona të plagosur.
Në mesazhin e saj, ylli i muzikës pop u drejtohet familjeve që po përjetojnë pasojat e këtij ankthi, duke theksuar rëndësinë e bashkimit dhe mbështetjes së ndërsjellë në kohë krizash. “Kolumbia ime e dashur, zemra ime është me të gjithë ata që e ndjenë këtë tërmet sot dhe me familjet që po kalojnë këtë kohë të vështirë. Në momente si këto, kolumbianët dinë të bashkohen dhe të mbështesin njëri-tjetrin. Gjithë forcën dhe dashurinë time për vendin tim. Le ta përqafojmë fort njëri-tjetrin dhe të qëndrojmë në kontakt për udhëzime në mënyrë që të ndihmojmë sa më shpejt të jetë e mundur”, ka shkruar Shakira.
Ajo ka inkurajuar qytetarët që të qëndrojnë të bashkuar dhe të ndjekin udhëzimet përkatëse, me qëllim që ndihma të shkojë sa më shpejt te të prekurit. Ky reagim publik ka gjetur mbështetje të gjerë, teksa vendi vazhdon përballjen me situatën e rëndë të krijuar nga fatkeqësia natyrore.