Ambasada e Shteteve të Bashkuara të Amerikës në Prishtinë u ka bërë thirrje udhëheqësve politikë në Kosovë që të punojnë për ndërtimin e institucioneve të reja, në përputhje të plotë me Kushtetutën dhe vendimet e Gjykatës Kushtetuese. Në një reagim zyrtar, institucioni diplomatik theksoi se ngërçi i vazhdueshëm politik po i kushton vendit mundësi të rëndësishme dhe dëmton stabilitetin e tij.
“Udhëheqja politike e Kosovës duhet të bashkëpunojë për të formuar institucionet në përputhje me Kushtetutën dhe vendimet e Gjykatës Kushtetuese. Populli i Kosovës pret nga udhëheqësit e tij që të përmbushin zotimin për të punuar në interesin më të mirë të vendit”, u theksua në qëndrimin e Ambasadës.
Mesazhi amerikan erdhi në të njëjtën ditë kur seanca konstituive e Kuvendit të Kosovës përfundoi pa rezultat. Kryeministri në detyrë, Albin Kurti, kërkoi kohë shtesë për zhvillimin e bisedimeve politike, duke argumentuar se duhet të arrihet fillimisht një dakordim për çështjen e Presidentit para se të vijohet me konstituimin e institucioneve të tjera. Kërkesa për shtyrje u miratua nga kryesuesi i seancës, Avni Dehari.
Sipas aktgjykimit të Gjykatës Kushtetuese, deputetët janë të detyruar ta konstituojnë Kuvendin brenda 30 ditëve nga dita e certifikimit të rezultateve zgjedhore. Ky afat ligjor skadon më 7 gusht, në orën 23:59.
Përditësime
Kryeministri në detyrë, Albin Kurti, nuk ka dhënë ende sinjale për thirrjen e seancës konstituive përpara skadimit të afatit kushtetues. Në këtë kontekst, Ambasada e Shteteve të Bashkuara në Prishtinë ka përsëritur thirrjen drejtuar liderëve politikë për formimin e institucioneve, duke nënvizuar nevojën për respektimin e plotë të afateve ligjore.
Zyra e Bashkimit Evropian në Kosovë u ka bërë thirrje sot liderëve politikë për formimin urgjent të institucioneve, duke nënvizuar rëndësinë e agjendës së integrimit. Ndërsa përfaqësuesit e BE-së refuzuan të komentojnë negociatat mes Lëvizjes Vetëvendosje dhe Lidhjes Demokratike të Kosovës, duke ia lënë përgjegjësinë akterëve vendorë, Ambasada e Gjermanisë iu bashkua zyrtarisht kërkesës për tejkalimin e bllokadës para skadimit të afateve kushtetuese. Ky apel pason thirrjet e ngjashme të bëra edhe nga SHBA-ja.