Presidenti i Shteteve të Bashkuara, Donald Trump, ka miratuar një marrëveshje bërthamore me Arabinë Saudite, e cila mund t'i japë mbretërisë aftësinë për pasurimin e uraniumit në kuadër të programit të saj civil bërthamor. Sipas burimeve, marrëveshja do të ketë një afat prej 30 vitesh dhe parashikon përfshirjen e kompanive amerikane në zhvillimin e industrisë bërthamore të mbretërisë, përfshirë ndërtimin e një impianti për pasurimin e uraniumit pas një studimi të përbashkët.
Marrëveshja, e cila pritet të bëhet publike të mërkurën, do t'i paraqitet Kongresit amerikan për shqyrtim. Ajo përballet me kritika, pasi ndryshe nga marrëveshjet e mëparshme, si ajo me Emiratet e Bashkuara Arabe në vitin 2009, kjo ujdi nuk kërkon nënshkrimin e Protokollit Shtesë të Agjencisë Ndërkombëtare për Energjinë Atomike (IAEA). Ky protokoll është thelbësor për monitorimin dhe verifikimin e zgjeruar të aktiviteteve bërthamore.
Administrata e Donald Trump argumenton se marrëveshja do të shoqërohet me mekanizma dypalësh kontrolli, megjithëse detajet e këtyre masave mbeten ende të paqarta. Ekspertët theksojnë se zhvillimi i kapaciteteve për pasurimin e uraniumit nga Riad-i mund të nxisë përhapjen e armëve bërthamore dhe të shkaktojë tensione në rajon. Gjithashtu, marrëveshja po interpretohet si standard i dyfishtë në raport me presionin që Uashington-i ushtron ndaj Iran-it për çështje të ngjashme bërthamore.
Ky zhvillim vjen në një periudhë kur SHBA dhe Izraeli ndjekin një strategji të koordinuar për të kufizuar aftësitë bërthamore të Teheran-it, duke shtuar pikëpyetje për balancat e sigurisë në Lindjen e Mesme.