Shtetet e Bashkuara të Amerikës shënuan sot 250-vjetorin e pavarësisë, duke përkujtuar miratimin e Deklaratës së Pavarësisë në vitin 1776. Ky dokument shënoi themelimin e shtetit amerikan dhe shkëputjen e 13 kolonive nga Mbretëria e Bashkuar, duke u shndërruar në një referencë globale për demokracinë dhe liritë individuale.
Në këtë përvjetor jubilar, drejtuesit e lartë të shtetit shqiptar kanë shprehur vlerësimet e tyre për marrëdhëniet mes dy vendeve. Kryeministri Edi Rama, përmes një mesazhi në rrjetet sociale, e cilësoi 4 Korrikun si një festë të veçantë për shqiptarët, duke e lidhur atë me vlerat e lirisë dhe miqësinë historike.
Presidenti i Republikës, Bajram Begaj, i përcolli urimet më të përzemërta Presidentit Donald Trump dhe popullit amerikan. Në mesazhin e tij, Begaj vlerësoi partneritetin strategjik të ndërtuar mbi baza të qëndrueshme ndër dekada, duke falënderuar Shtetet e Bashkuara për mbështetjen e vazhdueshme ndaj Shqipërisë, që nga njohja ndërkombëtare e shtetit shqiptar e deri te reformat e thella të ndërmarra në 35 vitet e fundit.
Në të gjithë territorin e SHBA-së janë organizuar ceremoni zyrtare, parada, koncerte dhe aktivitete kulturore për të kremtuar këtë festë kombëtare, ku marrin pjesë miliona qytetarë amerikanë.
Përditësime
Kryeministri Edi Rama uroi SHBA-në për 250-vjetorin e Pavarësisë, duke evokuar simbolikën e Statuas së Lirisë. Përmes këtij mesazhi, Rama rikonfirmoi partneritetin strategjik me Uashingtonin, ndërsa iu drejtua në mënyrë të tërthortë aktorëve politikë që synojnë të minojnë marrëdhëniet dypalëshe.