Në prag të 4 Korrikut, Ditës së Pavarësisë së Shteteve të Bashkuara të Amerikës, kryetari i Drenasit, Ramiz Lladrovci, ka publikuar një reagim ku vlerëson rolin historik të SHBA-së në lirinë dhe pavarësinë e Kosovës. Sipas tij, për qytetarët e Kosovës, Amerika nuk është thjesht një shtet aleat, por vetë liria.
Lladrovci u shpreh se rëndësia e kësaj marrëdhënieje ndonjëherë nuk perceptohet njëjtë nga gjeneratat e reja, duke shtuar se falënderimi për aleatin historik është keqinterpretuar nga disa si servilizëm. Ai theksoi se një qasje e tillë u shkon për shtat kundërshtarëve të pavarësisë së Kosovës.
Kryetari i Drenasit përmendi një kronologji të gjatë të miqësisë mes shqiptarëve dhe SHBA-së, duke veçuar momente kyçe si:
• Mbështetja historike që nga shekulli i 19-të;
• Angazhimi i Presidentit Wilson;
• Kontributi gjatë Luftës së Dytë Botërore;
• Mbështetja për Kushtetutën e vitit 1974;
• Vizitat e kongresmenëve amerikanë në Prishtinë në vitin 1990.