Bedri Hamza, kryetar i Partisë Demokratike të Kosovës (PDK), mbajti fjalë në seancën solemne të Kuvendit të Kosovës me rastin e 18-vjetorit të Pavarësisë, të shpallur më 17 shkurt 2008.
Ai u shpreh se shpallja e pavarësisë ishte kulmi i rezistencës dhe fitore e vendosmërisë së popullit që refuzoi nënshtrimin. "Pavarësia jonë nuk është gabim historik. Ajo është e drejtë e fituar me heronj, dëshmorë, martirë dhe përkrahjen e aleatëve", deklaroi Hamza. Ai theksoi se Kosova është realitet i pakthyeshëm dhe projekt i përfunduar i lirisë.
Hamza shprehu mirënjohje të përjetshme ndaj Shteteve të Bashkuara të Amerikës, vendeve të BE-së dhe ushtarëve të KFOR-it për mbështetjen në orët më të errëta të historisë. "Kosova nuk harron dhe di t'i nderon miqtë", tha ai.
Në fjalën e tij, Hamza nënvizoi se shtetësia nuk është vetëm flamur dhe himn, por siguri, drejtësi dhe ruajtje e së vërtetës historike. Ai reflektoi mbi gjyqet në Hagë, ku lufta çlirimtare dhe ish-udhëheqësit e UÇK-së – Hashim Thaçi, Jakup Krasniqi, Kadri Veseli e Rexhep Selimi – po gjykohen. "Besimi i Kosovës në drejtësinë ndërkombëtare nuk duhet tradhtuar. Nuk lejojmë që historia të rishkruhet në kurriz të sakrificës sonë", deklaroi ai.
Hamza theksoi se UÇK-ja nuk ishte ndërmarrje kriminale, por ushtri çlirimtare, përgjigje ndaj shtypjes dhe zë i popullit pa rrugë tjetër. Ai premtoi se Kosova do të forcojë shtetin, institucionet, drejtësinë dhe demokracinë, duke ruajtur kujtesën e sakrificave.
Përditësime
Bedri Hamza deklaroi: «Ne nuk pranojmë barazi artificiale mes agresorit shtetëror serb dhe rezistencës sonë për liri.»
Ai shtoi: «Sot festojmë, por njëkohësisht reflektojmë, sepse ndërkohë që ndërtojmë të ardhmen, pjesa më e lavdishme e historisë sonë – lufta çlirimtare – është në bankën e të akuzuarve në **Hagë».»