Kryetari i Partisë Demokratike të Kosovës, Bedri Hamza, ka reaguar pas raportimeve që tregojnë se Kosova renditet ndër dy vendet më të varfra në Evropë, me vetëm Ukrainën para saj.
Në një postim në rrjetin social Facebook, Hamza tha se lajmi duhet të shqetësojë të gjithë, sepse tregon qartë kah po rrëshqet vendi. Ai përshkroi gjendjen si pasqyrë të përditshmërisë së familjeve dhe qytetarëve që po përballen çdo ditë me vështirësi më të mëdha për të mbajtur jetën.
Hamza kritikoi qeverisjen e viteve të fundit, duke thënë se energjia e pushtetit është harxhuar në përçarje, propagandë dhe konflikte të pafundme politike. Sipas tij, qytetarët kanë mbetur të vetmuar përballë çmimeve të larta, pasigurisë dhe mungesës së perspektivës.
Ai bëri thirrje për një kthesë të madhe dhe për kthim kah bashkëpunimi, puna, zhvillimi dhe partneriteti me miqtë ndërkombëtarë. Kosova ka nevojë për institucione serioze që punojnë për mirëqenien e secilit qytetar dhe për stabilitetin e shtetit, shtoi Hamza.
"Ky vend meriton më shumë. Dhe unë besoj se bashkë mund t'ia kthejmë Kosovës drejtimin e duhur, para se të bëhet tepër vonë", ka shkruar ai.
Përditësime
Hamza vizitoi familjen e Afrim Mexhuanit në Obiliq dhe bëri thirrje për paga më të larta dhe çmime më të ulëta. Ai iu referua zgjedhjeve të 7 qershorit dhe 'kthesës së madhe'.