Kryetari i Partisë Demokratike të Kosovës dhe kandidati për kryeministër, Bedri Hamza, ka deklaruar se qytetarët e Kosovës meritojnë rezultate konkrete, zhvillim dhe më shumë shpresë për të ardhmen e vendit.
Në një postim publik, Hamza ka theksuar se PDK-ja e kishte dorëzuar qeverisjen me Kosovën shtet të pavarur, me autostrada moderne, institucione stabile dhe partneritete të fuqishme me aleatët ndërkombëtarë. Ai ka shtuar se shteti u ndërtua bashkë dhe se u krijuan polici dhe ushtri që sot janë shembull për rajonin.
Hamza ka kritikuar qeverinë aktuale për mungesë rezultatesh konkrete gjatë gjashtë viteve të fundit. Sipas tij, Kosova nuk mund të ecë përpara me fajësime, arsyetime dhe kriza të njëpasnjëshme politike, ndërsa shumë familje përballen çdo ditë me çmime të larta dhe vështirësi ekonomike.
"Qytetarët meritojnë rezultate. Meritojnë zhvillim. Meritojnë shpresë. Koha për ndryshim është tani", ka thënë Hamza.