Kryetari i Partisë Demokratike të Kosovës (PDK), Bedri Hamza, ka reaguar pas mbylljes së vendvotimeve, duke falënderuar qytetarët për pjesëmarrjen dhe kulturën demokratike të shfaqur. Përmes një deklarate, ai theksoi rëndësinë e ruajtjes së integritetit të votës dhe mbrojtjes së saj deri në përfundim të procesit të numërimit.
Hamza shprehu mirënjohje për institucionet, komisionerët, vëzhguesit, mediat dhe forcat e rendit për angazhimin në mbarëvajtjen e procesit. Ai nënvizoi se demokracia kërkon respektim të plotë të vullnetit qytetar, i cili reflektohet në rezultatet e kutive të votimit.
Ndërkohë, bazuar në të dhënat pas numërimit të 33 për qind të vendvotimeve, Lëvizja Vetëvendosje prin me rreth 41 për qind të votave, ndërsa PDK-ja renditet e dyta me rreth 22 për qind. Procesi i numërimit të votave vijon sipas procedurave ligjore deri në shpalljen e rezultateve përfundimtare.