Shtetet e Bashkuara dhe Izraeli kanë hartuar plane për sulme të reja ndaj Iranit, të cilat mund të zhvillohen pas zgjedhjeve të mesmandatit në SHBA, më 3 nëntor. Sipas raportimeve të The New York Times, të cituara nga disa media, ushtritë e dy vendeve kanë shtuar stërvitjet, përfshirë fluturime mbi Irak për të praktikuar manovra sulmuese. Sekretari amerikan i Mbrojtjes, Pete Hegseth, u takua këtë javë në Izrael me kryeministrin Benjamin Netanyahu për të diskutuar mundësinë e sulmeve të reja.
Objektivat e mundshme përfshijnë infrastrukturën energjetike, instalimet bërthamore dhe arsenalin iranian të raketave e dronëve. Në diskutime është përmendur edhe objekti bërthamor nëntokësor Pickaxe Mountain, i njohur në Iran si Kooh Kolang. Disa planifikues amerikanë vlerësojnë se një fushatë intensive treditore mund të shkaktojë dëme ekonomike të mjaftueshme për ta nxitur Teheranin të bëjë lëshime diplomatike. Megjithatë, miratimi i presidentit Donald Trump mbetet i pasigurt. Sipas The New York Times, Trumpi ka refuzuar disa herë këtë vit propozime për rifillimin e operacioneve të mëdha luftarake. Në fillim të tetorit, ai shtyu në momentet e fundit një sulm për të cilin forcat amerikane dhe izraelite kishin përfunduar përgatitjet dhe ishin vendosur në gatishmëri maksimale.
Sipas njërit prej raportimeve, SHBA-ja po grumbullon forca që pritet të jenë plotësisht të dislokuara në fillim të nëntorit, përfshirë tri aeroplanmbajtëse, mijëra marinsa, avionë luftarakë dhe forca speciale. Zgjedhjet izraelite të 27 tetorit dhe ato amerikane janë faktorë politikë në vendimmarrjen për një operacion të mundshëm.
Trumpi tha të mërkurën se Uashingtoni nuk po negocion me Iranin dhe se “diçka, në një mënyrë apo tjetrën” do të ndodhë “shumë shpejt”. Gjatë një tubimi në Karolinën e Jugut, ai tha se SHBA-ja mund ta përfundonte luftën, por dëshironte të sigurohej që paqja të zgjaste. Ai pretendoi se Irani ishte mposhtur ushtarakisht dhe financiarisht dhe përsëriti se Teherani nuk do të ketë armë bërthamore. Një zyrtar i Shtëpisë së Bardhë tha për The New York Times se administrata nuk komenton plane ushtarake “që mund të ekzistojnë ose jo”.
Irani ka paralajmëruar se një sulm i ri nuk do të pasohej nga një konflikt i shkurtër dhe i kufizuar. Mahdi Mohammadi, këshilltar i lartë i negociatorit iranian Mohammad Bagher Ghalibaf, e quajti “fantazi” idenë se një fushatë amerikane mund të përfundonte brenda 72 orësh. Ai paralajmëroi se kundërpërgjigjja do të ishte më e ashpër, krijuese dhe e larmishme. Zyrtarë iranianë kanë përmendur si objektiva të mundshëm edhe qendrat e të dhënave dhe kabllot nënujore të internetit.
Negociatat për programin bërthamor dhe lundrimin në Ngushticën e Hormuzit kanë ngecur, pavarësisht memorandumit të mirëkuptimit të nënshkruar në qershor nga SHBA-ja dhe Irani, pas ndërmjetësimit të Pakistanit dhe Katarit. Analistët e cituar në burime paralajmërojnë se një ofensivë e re mund të mos arrijë objektivat që nuk u realizuan gjatë fazës së parë të luftës, si dhe mund të përshkallëzojë konfliktin rajonal e të rrisë çmimet globale të energjisë.