Shtetet e Bashkuara dhe Izraeli u zotuan se nuk do të ndalen në fushatën e tyre ushtarake kundër Iranit. Kjo deklaratë erdhi teksa Tel Avivi lëshoi një "valë të re të sulmeve" dhe presidenti amerikan Donald Trump tha se Teherani do të goditet dhe lëndohet edhe më tepër në ditët në vijim. Deklaratat u bënë më 3 shkurt në Shtëpinë e Bardhë, gjatë një takimi midis Trump-it dhe kancelarit gjerman Friedrich Merz.
Trump deklaroi se "goditjet e shkallës së gjerë nisin tani". Ai shtoi se ata nuk kanë më mbrojtje ajrore apo sisteme gjurmimi dhe do të lëndohen shumë. Presidenti amerikan përsëriti se, përveç liderit suprem Ali Khamenei, një pjesë e mirë e udhëheqjes iraniane është vrarë në sulmet amerikano-izraelite. "Shumica e njerëzve që kemi pasur në mendje tanimë janë të vdekur. Tani e kemi një grup tjetër. Edhe ata mund të jenë të vdekur, bazuar në raportime", tha ai.
Shefi i Komandës Qendrore të Ushtrisë amerikane, admirali Brad Cooper, përshkroi operacionin "Tërbimi Epik" si pozicionimin më të madh të ushtrisë amerikane në Lindjën e Mesme brenda një gjenerate. Ai raportoi se operacioni përfshin mbi 50.000 trupa, mbi 200 aeroplanë luftarakë, dy aeroplanmbajtëse dhe bombarduese me rreze të gjatë. Sipas Cooper-it, faza hyrëse është dyfish më e madhe se operacioni "Tronditje dhe habi" të vitit 2003 në Irak.
Admirali theksoi se nuk ka asnjë anije iraniane në ujërat e Gjirit Arab, Ngushticës së Hormuzit apo Gjirit të Omanit. Ai raportoi shkatërrimin e 17 anijeve të marinës iraniane, përfshirë një nëndetëse, dhe rrëzimin e gati 2.000 targeteve në Iran brenda katër ditësh. "Ky është vetëm fillimi. Besoj se ne, bashkë me aleatët, do t’i arrijmë objektivat tanë ushtarakë", tha Cooper.