UNHCR, agjencia e Kombeve të Bashkuara për Refugjatët, deklaroi më 4 mars se rreth 100 mijë persona u larguan nga kryeqyteti iranian, Teherani, gjatë dy ditëve të para pas fillimit të sulmeve ajrore nga Shtetet e Bashkuara dhe Izraeli ndaj Iranit.
Lëvizjet masive të popullsisë janë regjistruar kryesisht brenda territorit iranian. Raportet e OKB-së nuk tregojnë rritje të lëvizjeve ndërkufitare drejt vendeve fqinje. Në pikën kufitare Islam Qala, që lidh Iranin me Afganistanin, situata mbetet e qëndrueshme, pa ndryshime të mëdha në numrin e kaluesve. Autoritetet ndërkombëtare po monitorojnë nga afër zhvillimet, duke paralajmëruar se situata mund të ndryshojë shpejt nëse konfliktet përshkallëzohen.
Ndërkohë, Sekretari amerikan i Mbrojtjes, Pete Hegseth, konfirmoi se një nëndetëse amerikane ka fundosur një anije luftarake iraniane pranë brigjeve të Sri Lankës. Ai e përshkroi operacionin si një “vdekje të heshtur”, të kryer me saktësi dhe pa paralajmërim. Si pasojë, të paktën 87 marinarë iranianë kanë humbur jetën, ndërsa dhjetëra të tjerë janë plagosur ose rezultojnë të zhdukur. Autoritetet e Sri Lankës njoftuan se 32 marinarë iranianë janë shpëtuar nga uji.
Zyftarë ushtarakë amerikanë deklaruan se Irani ka filluar të lëshojë më pak raketa drejt objektivave në rajonin e Gjirit. Kjo lidhet me dobësimin e ndjeshëm të kapaciteteve ushtarake iraniane.
Pete Hegseth theksoi se Shtetet e Bashkuara disponojnë burime të mjaftueshme ushtarake për të vazhduar fushatën, e nisur më 28 shkurt paralelisht me sulmet e Izraelit, për aq kohë sa të jetë e nevojshme.