Kryeministri në detyrë, Albin Kurti, ka kërkuar zyrtarisht që Serbia të mundësojë qasjen në dosjet e Brigadës së 37-të të Motorizuar të ish-Ushtrisë Jugosllave. Kjo njësi ushtarake dyshohet se ka marrë pjesë në masakra të kryera në zonën e Drenicës dhe në pjesë të tjera të Kosovës gjatë luftës së vitit 1999.
Në lidhje me këtë kërkesë, Ambasada e Shteteve të Bashkuara të Amerikës në Prishtinë ka deklaruar qëndrimin e saj për mediat. Në përgjigjen e dhënë për Klankosova.tv, përfaqësia diplomatike amerikane theksoi se vazhdon të mbështesë pa rezervë përpjekjet për hetimin e krimeve të luftës dhe vendosjen e drejtësisë për viktimat e konfliktit.
Sipas njoftimit të Ambasadës së ShBA-së, sjellja e drejtësisë për familjet e viktimave mbetet një përparësi. Institucioni amerikan nënvizoi se çdo familje meriton të ketë përgjigje për fatin e të dashurve të tyre të zhdukur gjatë luftës.