Ministri i Punëve të Jashtme i Shqipërisë, Ferit Hoxha, u bë pjesë e një takimi ndërkombëtar të iniciuar nga Sekretari Amerikan i Shtetit, Marco Rubio, për të adresuar shqetësimet lidhur me ekstremizmin e majtë. Takimi mblodhi udhëheqës nga mbi 60 vende të botës, në kuadër të përpjekjeve të administratës Trump për të frenuar atë që cilësohet si "terrorizëm politik i së majtës", një çështje kryesore për republikanët në prag të zgjedhjeve të mes-mandatit.
Nisma pason një kabllogram të dërguar në 20 ambasada amerikane, përfshirë atë në Tiranë, përmes të cilit kërkohej informacion mbi grupet e ekstremit të majtë. Gjatë takimit, Sekretari Rubio kritikoi qëndrimet e atyre që, sipas tij, minimizojnë dhunën kur ajo kryhet për kauza të majta, duke e cilësuar këtë qasje si një "pikë të verbër" në doktrinën globale kundër terrorizmit.
Sipas të dhënave të raportuara nga Associated Press dhe një raporti të Qendrës për Studime Strategjike dhe Ndërkombëtare (CSIS), deri më 4 korrik 2025, sulmet terroriste të lidhura me të majtën kishin tejkaluar për herë të parë pas 30 vitesh ato të ekstremit të djathtë. Statistikat tregojnë se deri në atë periudhë ishin regjistruar pesë incidente nga e majta, kundrejt një incidenti nga e djathta. Zyrtarët amerikanë u bënë thirrje vendeve evropiane dhe atyre të Amerikës Latine të bashkojnë forcat përballë këtij fenomeni.