Shtetet e Bashkuara kanë mbyllur përkohësisht ambasadat e tyre në Arabinë Saudite dhe Kuvajt, si dhe kanë zvogëluar praninë konsullore në disa vende të tjera të Lindjes së Mesme, për shkak të sulmeve të vazhdueshme në rajon.
Sipas raportimeve nga CNN, Ambasada Amerikane në Arabinë Saudite u mbyll pas sulmit me dy dronë, të cilët dyshohet se janë iranianë. Në Kuvajt, ambasada njoftoi mbylljen e dyerve "deri në njoftim të mëtejshëm". Departamenti i Shtetit kishte urdhëruar më parë largimin e personelit qeveritar nga ky vend. Të hënën, një video e siguruar nga Reuters tregoi tym që ngrihej nga zona pranë ambasadës në Kuvajt, çka rriti shqetësimet për sigurinë.
Departamenti i Shtetit i SHBA-së ka paralajmëruar qytetarët amerikanë të largohen menjëherë nga 14 vende në rajon për shkak të "rreziqeve serioze të sigurisë". Gjithashtu, personelit qeveritar dhe familjeve të tyre u është kërkuar të largohen nga:
• Jordania
• Bahreini
• Katari
• Iraku
• Emiratet e Bashkuara Arabe
Zyrtarët amerikanë po monitorojnë situatën dhe kanë paralajmëruar se tensionet mund të përshkallëzohen në ditët e ardhshme. Vendimi reflekton shqetësimin e SHBA-së për sigurinë e stafit dhe ndikimin e konfliktit në operacionet diplomatike.
Përditësime
Departamenti i Shtetit i SHBA-së ka mbyllur ambasaden në Bejrut deri në njoftim të mëtejshëm – masa e tretë e tillë.
- Anuloi të gjitha takimet konsullore në Bejrut.
- Personeli jo-emergjent u largua më parë nga Bejruti, para sulmeve SHBA-Izraelite ndaj Iranit.
Kjo masë lidhet me sulmet izraelite në Bejrut kundër Hezbollah.