Qeveria Trump njoftoi të premten miratimin e shitjes së 30 helikopterëve sulmues AH-64E Apache, si dhe pajisje dhe shërbime shoqëruese, për Izraelin, aleatin më të ngushtë të Uashingtonit në Lindjen e Mesme.
Vlera totale e marrëveshjes parashikohet të arrijë 3,8 miliardë dollarë. Marrëveshja vjen në një moment kur po respektohet një armëpushim i brishtë në Rripin e Gazës.
Shtetet e Bashkuara mbeten “të përkushtuara ndaj sigurisë së Izraelit dhe është jetike për interesat kombëtare të SHBA-së që Izraeli të mbështetet për të zhvilluar kapacitete të forta dhe të gatshme mbrojtëse”, thuhet në njoftimin e Departamentit të Shtetit.
Kongresi amerikan është njoftuar për transaksionin, ashtu siç kërkohet nga legjislacioni për shitjet e mëdha të armëve.