Sipas një raportimi nga gazeta The New York Times, Shtetet e Bashkuara të Amerikës kishin dyshime të forta se Izraeli po hartonte plane për të eliminuar dy figura kyçe të delegacionit iranian gjatë zhvillimit të negociatave për armëpushim. Objektivat e dyshuara ishin ministri i Jashtëm i Iranit, Abbas Araghchi, dhe kryetari i Parlamentit, Mohammad Bagher Ghalibaf.
Zyrtarët amerikanë vlerësuan se një sulm i tillë do të minonte seriozisht përpjekjet diplomatike dhe do të çonte në një përshkallëzim të ri të konfliktit në rajon. Për këtë arsye, Uashingtoni u kërkoi vendeve të Gjirit që, përmes kanaleve diplomatike, të paralajmëronin autoritetet në Teheran për rrezikun e mundshëm. Administrata amerikane e shihte arritjen e një marrëveshjeje përkohshme si prioritet, ndërsa Izraeli mbeti skeptik ndaj negociatave, duke e konsideruar ndryshimin e regjimit në Teheran si një nga qëllimet e tij strategjike.
Masat e sigurisë për negociatorët iranianë u shtuan ndjeshëm. Gjatë një vizite në Pakistan, avioni që transportonte zyrtarët u shoqërua nga avionë luftarakë pakistanezë. Raportimet e mediave theksojnë se gjatë fluturimit të kthimit nga ky takim, shërbimet e sigurisë u informuan për praninë e dy avionëve luftarakë izraelitë në afërsi të hapësirës ajrore, gjë që rriti shqetësimet për sigurinë e delegacionit.
Dallimet në objektiva midis Uashingtonit dhe Tel Avivit u theksuan pas marrëveshjes kornizë të arritur në qershor, e cila synonte hapjen e Ngushticës së Hormuzit dhe bisedime të mëtejshme për programin bërthamor. Përderisa SHBA-ja kërkonte stabilizim përmes dialogut, Izraeli vazhdoi të shënjestronte përfaqësues të lartë të establishmentit iranian, duke i konsideruar ata si objektiva legjitimë në përpjekjet për të dobësuar regjimin.