Shtetet e Bashkuara kanë paralajmëruar se çdo kompani detare që paguan tarifa ndaj Iranit për të kaluar nëpër Ngushticën e Hormuzit rrezikon sanksione, edhe nëse pagesat bëhen në formën e donacioneve.
Sipas Departamentit të Thesarit, pagesat ndaj Iranit, përfshirë ato si ndihmë humanitare për organizata si Gjysmëhënën e Kuqe Iranian e, mund të konsiderohen shkelje dhe të sjellin pasoja ligjore.
Ngushtica e Hormuzit është një nga rrugët detare më të rëndësishme në botë, ku kalon rreth 20% e transportit global të naftës dhe gazit. Sipas autoriteteve amerikane, Irani ka propozuar vendosjen e tarifave për anijet që kalojnë në këtë zonë, si pjesë e ideve për t’i dhënë fund konfliktit me SHBA-në dhe Izraelin.
SHBA është në dijeni të presioneve dhe kërkesave iraniane ndaj kompanive detare për pagesa në këmbim të kalimit të sigurt. Paralajmërimi vjen në një moment të ndjeshëm, kur Irani ka dërguar një propozim të ri për negociata me SHBA-në përmes ndërmjetësve pakistanezë.
Zyra për Kontrollin e Aktiveve të Huaja (OFAC) sqaron se pagesat mund të bëhen në forma të ndryshme, si para cash, valuta digjitale, marrëveshje të fshehta apo donacione simbolike për institucione iraniane ose llogari të ambasadave.
Në deklaratë thuhet: “Ky paralajmërim synon të informojë si qytetarët amerikanë ashtu edhe të huajt për rrezikun e sanksioneve që lidhet me këto pagesa ndaj regjimit iranian apo për kërkimin e garancive për kalim të sigurt”. Autoritetet amerikane theksojnë se rreziku i sanksioneve mbetet i njëjtë, pavarësisht formës së pagesës.