Shtetet e Bashkuara të Amerikës kanë njoftuar vendosjen e sanksioneve të reja ndaj Iranit, si përgjigje ndaj sulmeve të forcave iraniane ndaj anijeve tregtare në Ngushticën e Hormuzit. Ky vendim vjen pas një jave përplasjesh ushtarake, gjatë së cilës forcat iraniane sulmuan anije tregtare nga Katari dhe Arabia Saudite, duke shkaktuar kundërpërgjigje ushtarake nga ana e SHBA-së ndaj objektivave në Iran.
Në shënjestër të Departamentit amerikan të Thesarit është vënë Ali Ansari, një bankier dhe biznesmen me bazë në Dubai. Ai akuzohet për menaxhimin e një rrjeti të gjerë asetesh në dobi të liderit iranian, Mojtaba Khamenei, dhe Gardës Revolucionare Islamike të Iranit (IRGC). Sanksionet godasin gjithashtu kompani të këmbimit valutor, të cilat, sipas autoriteteve amerikane, kanë shërbyer si maskim për transferimin e miliarda dollarëve në vit në emër të bankave të sanksionuara iraniane.
Administrata amerikane ka shfuqizuar gjithashtu licencën që i lejonte Iranit shitjen e naftës pa kufizime. Presidenti Donald Trump ka deklaruar se memorandumi i mirëkuptimit midis dy vendeve ka përfunduar, megjithatë ai konfirmoi se bisedimet me Teheranin do të vijojnë, pas kërkesës së palës iraniane.