Administrata amerikane ka vendosur sanksione të reja kundër 3 individëve dhe 9 kompanive, të akuzuara për lehtësimin e shitjes së naftës iraniane drejt Kinës. Departamenti i Thesarit njoftoi se subjektet e sanksionuara ndodhen në Hong Kong, Emiratet e Bashkuara Arabe dhe Oman, dhe kanë ndihmuar Gardën Revolucionare Islamike në transportin dhe tregtimin e naftës.
Sipas autoriteteve të Uashingtonit, Irani ka përdorur kompani guackë për të fshehur rolin e saj në këtë tregti dhe për të kanalizuar të ardhurat drejt regjimit. Sekretari i Thesarit, Scott Bessent, deklaroi se administrata e presidentit Donald Trump do të vazhdojë t’i mohojë Iranit financimet për programet e armëve, rrjetet e aleatëve të armatosur dhe ambiciet bërthamore.
"Departamenti i Thesarit do të vazhdojë të shkëpusë regjimin iranian nga rrjetet financiare që përdor për të kryer akte terroriste dhe për të destabilizuar ekonominë globale", tha Bessent. Sanksionet u shpallën para takimit të planifikuar në Pekin mes Trump dhe presidentit kinez Xi Jinping, ku çështja iraniane pritet të jetë temë kryesore.
Kjo paketë vjen pas sanksioneve të tjera të shpallura javën e kaluar ndaj individëve dhe kompanive, përfshirë subjekte kineze, të akuzuara për furnizimin e komponentëve për programet iraniane të dronëve dhe raketave balistike. Kina mbetet partnerja më e madhe ekonomike e Iranit dhe blerësja kryesore e naftës së tij. Masat synojnë të rrisin presionin ndaj Teheranit për programin bërthamor, pajisjet ushtarake dhe mbështetjen e grupeve aleate në Lindjen e Mesme.