Më 25 gusht 2026, Departamenti Amerikan i Shtetit publikoi një udhëzim të përditësuar për qytetarët amerikanë që planifikojnë të udhëtojnë në Kosovë. Sipas njoftimit, vendi vazhdon të klasifikohet në nivelin e dytë të rrezikut, që nënkupton “Ushtro kujdes të shtuar”. Megjithatë, për zonat veriore të vendit, alarmi është ngritur në nivelin e tretë, me rekomandimin “Rishiko udhëtimin”.
Në këshillën e autoriteteve amerikane theksohet se tensionet që lidhen me situatën politike mund të përshkallëzohen shpejt, duke shkaktuar pengesa në transport dhe ndërprerje të shërbimeve të tjera thelbësore. Gjithashtu, është ngritur paralajmërimi për mundësinë e dhunës, përfshirë sulmet terroriste në rajonin e Ballkanit, ku përfshihet edhe Kosova.
Për katër komunat veriore – Mitrovicën e Veriut, Leposaviqin, Zubin Potokun dhe Zveçanin – Departamenti i Shtetit sugjeron rishqyrtimin e planeve të udhëtimit për shkak të potencialit për trazira të dhunshme civile si pasojë e tensioneve ndëretnike. Protestat në këto zona mund të nisin pa paralajmërim, duke ndikuar drejtpërdrejt në lëvizjen e qytetarëve.
Për shkak të kapaciteteve të kufizuara të qeverisë amerikane për të ofruar ndihmë emergjente në këto zona, lëvizjet e punonjësve të qeverisë së SHBA-së drejt katër komunave veriore janë të kufizuara. Qytetarët amerikanë që zgjedhin të udhëtojnë në Kosovë këshillohen të ndjekin këto masa sigurie:
- Regjistrimi në programin Smart Traveler Enrollment Program (STEP).
- Shmangia e protestave dhe turmave të njerëzve.
- Ndjekja e rregullt e raportimeve të mediave lokale.
- Përgatitja e një plani emergjent largimi që nuk mbështetet në ndihmën e qeverisë amerikane.