Forcat e armatosura të Shteteve të Bashkuara kanë ndërhyrë duke rrëzuar dy dronë iranianë, të cilët po lëviznin në drejtim të anijeve tregtare në Ngushticën e Hormuzit. Sipas njoftimeve nga Komanda Qendrore e SHBA-së (CENTCOM), mjetet fluturuese përbënin një kërcënim për trafikun ndërkombëtar, ndërsa zyrtarët amerikanë konfirmuan se qarkullimi në këtë rrugë strategjike vazhdon normalisht.
Nga ana tjetër, media shtetërore iraniane IRIB raportoi një version të ndryshëm të ngjarjeve. Sipas këtyre burimeve, shpërthimet e dëgjuara pranë portit Sirik dhe ishullit Qeshm ishin rezultat i masave të marra nga marina e Gardës Revolucionare të Iranit (IRGC). Autoritetet iraniane pretendojnë se forcat e tyre kanë ndërhyrë ndaj një tankeri që kishte shkelur kufizimet e lundrimit, duke e detyruar atë të respektonte ndalimin pas paralajmërimeve.
Ky zhvillim shënon një tension të ri në rajon, pavarësisht mesazheve optimiste të dhëna së fundmi nga Shtëpia e Bardhë mbi mundësinë e një marrëveshjeje për t'i dhënë fund luftës. Ndërsa Uashingtoni kërkon garantimin e lundrimit të lirë për trafikun ndërkombëtar të naftës, Teherani vijon të kërkojë kontroll më të rreptë dhe zbatimin e tarifave për anijet që kalojnë në ngushticë.
Përditësime
Komanda Qendrore e SHBA (CENTCOM) konfirmoi rrëzimin e disa dronëve iranianë pranë Ngushticës së Hormuzit, të cilët përbënin kërcënim për trafikun detar ndërkombëtar. Raportimet e Reuters dhe SkyNews konfirmojnë incidentin. Paralelisht, Uashingtoni dhe Teherani po shënojnë përparim në negociatat për një marrëveshje të mundshme.
Komanda Qendrore e Ushtrisë Amerikane konfirmoi rrëzimin e të gjithë dronëve sulmues njëdrejtimësh, të nisur gjatë orëve të fundit në afërsi të Ngushticës së Hormuzit.