Kryetari i Partisë Mundësia, Agron Shehaj, deklaroi se Partia Socialiste nuk e mbron më zëvendëskryeministren Belinda Balluku, të pezulluar nga drejtësia. Kjo vjen pas deklaratave të prokurorëve të SPAK-ut në mbledhjen e Këshillit të Mandateve, ku ata kërkuan arrestimin e saj.
Sipas Shehajit, prokurori i SPAK-ut ka thënë se dëshmitarët në hetimet ndaj Ballukut janë kërcënuar nga elementë të krimit të organizuar dhe anëtarë të kabinetit të saj. Ata kanë tentuar gjithashtu t'i blejnë dëshmitarët.
Shehaj theksoi se pozitat e Belinda Ballukut para drejtësisë janë rënduar, duke rrezikuar tani 35 vite burg, jo 10 si më parë. Në një postim në rrjetet sociale, ai shkroi: "Dëshmitarët e Belinda Ballukut janë kërcënuar nga elementë të krimit të organizuar. Jo vetëm kaq, por anëtarë të kabinetit të Ballukut kanë kërcënuar dëshmitarët dhe kanë tentuar t'i blejnë ata. Këtë ka thënë sot prokurori i SPAK-ut në mbledhjen e Këshillit të Mandateve. Jo vetëm kaq, por Belinda Balluku rrezikon plot 35 vite burg për atë që ka bërë."
Ai shtoi se pushtetarët e korruptuar të qeverisjes socialiste kanë humbur betejën me drejtësinë, sepse Perëndimi ka vendosur ndëshkimin e tyre dhe një Shqipëri normale. "E keni kot! Belinda Balluku është e pambrojtshme. Të korruptuarit e kanë të humbur betejën me drejtësinë, sepse kjo është ajo çfarë ka vendosur Perëndimi: ndëshkimin e të korruptuarve dhe një Shqipëri normale!", shkroi Shehaj.