Dashamir Shehi, kryetar i Lëvizjes për Zhvillim Kombëtar (LZHK), foli mbrëmjen e 29 janarit 2026 në emisionin “Opinion” të TV Klan-it për mundësinë e bashkimit të opozitës kundër mazhorancës.
Ai u shpreh skeptik ndaj një bashkimi formal pa parime të qarta dhe pa reflektim për gabimet e së shkuarës. “Nëse na thonë ec te oborri jonë se kemi gjelin, nuk vlen!”, tha Shehi, duke ironizuar idenë e një opozite të bashkuar vetëm në emër, pa barazi dhe pa respekt reciprok mes forcave politike.
Sipas tij, bashkëpunimi nuk mund të ndërtohet mbi logjikën e nënshtrimit apo dominimit. Kreu i LZHK-së theksoi se opozita duhet së pari të pranojë gabimet dhe të përpiqet t’i rikuperojë ato. “Ça do bëjmë, do bëjmë krushqni ne? Në qoftë se bijmë dakord për këto gjëra, që është gabuar e po mundohemi t’i rikuperojmë, mund të bëjmë një rrugë bashkë”, deklaroi ai.
Shehi përmendi gjithashtu drejtësinë si shpresën kryesore të opozitës. “A bijmë dakord që shpresa më e madhe që kemi ne si opozitarë është kjo drejtësi, e keq, e dhunuar, e korruptuar? Po s’kemi më të mirë se kaq”, u shpreh ai, duke e cilësuar si mundësi për pastrimin e shoqërisë shqiptare.