Shembja e aksit rrugor Librazhd-Prrenjas ka bllokuar lëvizjen e mjeteve të rënda në juglindje të Shqipërisë. Rreth 40 kamionë ndodhen të bllokuar në pikën doganore të Qafë-Thanës, ku drejtuesit presin prej tri deri në katër ditësh për shkak të pengesave doganore dhe mungesës së autorizimeve për ndryshimin e itinerarit.
Drejtuesit e kamionëve, kryesisht nga Turqia, shprehen se përballen me mungesë ushqimi, uji dhe nafte. Një kamionist turk deklaroi: "Kemi që të dielën që presim këtu në të ftohtë. Po na mbaron ushqimi, sot me sa shoh është vakti i fundit se na mbaroi edhe buka edhe uji."
Në një konferencë për shtyp, Drejtori i Përgjithshëm i Doganave Besmir Beja deklaroi masat e marra për garantimin e vijimësisë së qarkullimit të mallrave dhe kryerjen e formaliteteve doganore. Ai theksoi se strukturat doganore kanë trajtuar me prioritet shqetësimet e bizneseve dhe kanë orientuar alternativa të reja lëvizjeje:
• Bllatë (Dibër), për mallrat që hyjnë nga Maqedonia e Veriut;
• Kakavijë, për mallrat që hyjnë nga Greqia.
Janë ndërmarrë masa për përforcimin e kapaciteteve logjistike dhe shtimin e personelit në këto pika kufitare, me qëllim përballimin e fluksit të shtuar dhe përshpejtimin e procedurave deri në normalizimin e situatës rrugore.
Në bashkëpunim me autoritetet maqedonase është siguruar mirëkuptim për lehtësimin e qarkullimit në Bllatë:
• Kalimi i kamionëve dhe trajlerave të ngarkuar nga ora 12:00–22:00;
• Kalimi 24 orë i mjeteve pa ngarkesë;
• Kalimi i produkteve agro që kërkojnë certifikim.
Dogana shqiptare vijon kontaktet me palën kosovare për lehtësime të mëtejshme. Për mallrat e hyrë tashmë nëpërmjet Qafë-Thanës dhe të bllokuara në aksi, zbatohet regjimi i Transitit të Jashtëm (T1), sipas Kodit Doganor. Ky regjim lejon tranzitimin e mallrave nga një pikë doganore në tjetrën përmes territori jashtë doganor shqiptar, siç është drejt Bllatës, me depozitimin e deklaratës T1 dhe dokumentit të transportit (CMR).
Besmir Beja pranoi se situata sjell kosto shtesë për bizneset, por theksoi angazhimin për minimizimin e ndikimit.
Përditësime
- Në pikën doganore të Bllatës, autoritetet maqedonase nuk lejojnë kalimin e produkteve ushqimore me origjinë shtazore dhe botëve të naftës.
- Këto kategori mallrash duhet të kalojnë nëpërmjet Kosovës.