Një incident i rëndë ka ndodhur gjatë ditës së sotme në një kantier ndërtimi në rrugën “A”, në Lagjen e Spitalit në Prishtinë, ku një kran është shembur gjatë punimeve. Si pasojë e rrëzimit të pajisjes, dy persona kanë pësuar lëndime trupore.
Zëdhënësi i Policisë së Kosovës për rajonin e Prishtinës, Enis Pllana, ka konfirmuar zyrtarisht se dy persona kanë mbetur të lënduar dhe se ata kanë pranuar tretman mjekësor. Njësitet policore kanë dalë menjëherë në vendin e ngjarjes për të ndërmarrë veprimet e nevojshme procedurale. Aktualisht, organet kompetente në koordinim me Prokurorin e Shtetit kanë filluar hetimet për sqarimin e rrethanave në të cilat ka ndodhur incidenti.
Sipas informacioneve të siguruara, të lënduarit janë dërguar për trajtim të mëtejshëm mjekësor në Qendrën Klinike Universitare të Kosovës (QKUK). Burime të ndryshme kanë bërë të ditur se njëri prej personave të lënduar dyshohet se ndodhet në gjendje të rëndë shëndetësore. Ekipet e emergjencës dhe autoambulancat kanë qenë të pranishme në vendngjarje për t'u ofruar ndihmën e parë personave që ishin bllokuar nën rrënoja, të cilët më pas janë nxjerrë nga ekipet intervenuese.
Përditësime
Njëri nga dy punëtorët e lënduar nga shembja e kranit në Prishtinë ka ndërruar jetë. Drejtori i Klinikës Emergjente, Naser Syla, konfirmoi se viktima nuk u mbijetoi plagëve, pavarësisht përpjekjeve të ekipeve mjekësore. Viktimat janë të moshës 24 dhe 16 vjeç (të lindur në vitet 2000 dhe 2008). Ky njoftim ndryshon bilancin fillestar, i cili raportonte vetëm për dy persona të lënduar.