Shërbimi Sekret i SHBA-së bëri të ditur të dielën se po heton raportet për të shtëna me armë zjarri gjatë natës pranë Parkut Lafayette, i cili ndodhet përballë Shtëpisë së Bardhë në Uashington.
Sipas deklaratës zyrtare, pas mesnatës u krye një kontroll i plotë i parkut dhe zonës përreth, por nuk u raportuan të lënduar dhe nuk u gjet asnjë i dyshuar. Donald Trump po kalonte fundjavën në Shtëpinë e Bardhë, e cila nuk dha koment të menjëhershëm mbi incidentin.
Operacionet në Shtëpinë e Bardhë vazhduan normalisht, ndërsa masat e sigurisë në zonë u rritën. Parku Lafayette ka qenë i rrethuar me gardh prej javësh për punime rinovuese, çka ka kufizuar aksesin.
Shërbimi Sekret po bashkëpunon me policinë e Distriktit të Kolumbias dhe Policinë e Parkut të SHBA-së për zbardhjen e ngjarjes. Për disa orë u mbyllën rrugë ngjitur me parkun, por pas orës 8:00 të mëngjesit kufizimet u hoqën, sipas shefit të komunikimit Anthony Guglielmi në një postim në X.
Autoritetet kërkojnë një automjet me të cilin dyshohet se është larguar autori dhe inkurajojnë publikun të njoftojë për çdo dyshim. Hetimet vazhdojnë pa detaje të tjera mbi rrethanat.