Një ngjarje e rëndë është regjistruar në Velipojë, ku një konflikt mes disa shtetasve ka degraduar në përdorimin e armëve të zjarrit. Fillimisht, palët janë përfshirë në një përplasje fizike me grushte, e cila ka rezultuar në lëndimin e një prej personave.
I dëmtuari është transportuar për në Spitalin Rajonal të Shkodrës, ku po merr ndihmën e nevojshme mjekësore. Sipas të dhënave, gjendja e tij shëndetësore është e stabilizuar dhe ndodhet jashtë rrezikut për jetën.
Gjatë përshkallëzimit të konfliktit, një prej pjesëmarrësve ka nxjerrë një armë zjarri dhe ka qëlluar në ajër. Menjëherë pas këtij veprimi, personi është larguar nga vendngjarja në drejtim të paditur.
Forcat e policisë kanë mbërritur në vendin e ngjarjes dhe kanë identifikuar palët e përfshira. Aktualisht, po vijon puna për gjetjen dhe kapjen e autorit të të shtënave, ndërsa grupi hetimor po punon për zbardhjen e rrethanave të plota të këtij incidenti.