Një incident i dhunshëm ka ndodhur mesditën e së dielës në zonën e Velipojës, ku dy shtetas janë përleshur fizikisht. Sipas njoftimit zyrtar të Policisë së Shtetit, të përfshirët në këtë konflikt janë shtetasit me iniciale A. R. dhe K. G., të cilët dyshohet se janë përplasur për motive të dobëta.
Gjatë konfliktit, palët kanë përdorur sende të forta, ndërsa nga veprimet e para hetimore dyshohet se është qëlluar edhe me armë zjarri në ajër. Si pasojë e dëmtimeve të marra gjatë përleshjes, të dy shtetasit janë dërguar për trajtim mjekësor në Spitalin Rajonal Shkodër, ku ndodhen nën kujdesin e mjekëve.
Grupi hetimor, nën drejtimin e Prokurorisë, po vijon punën për zbardhjen e plotë të rrethanave të ngjarjes. Autoritetet po punojnë për përcaktimin e përgjegjësisë penale të të përfshirëve dhe për identifikimin e personave të tjerë që mund të kenë qenë të përfshirë në incident.