Një incident është regjistruar pasditen e 29 marsit 2026 në Pallatin e Sportit Ramazan Njala në Durrës, gjatë ndeshjes së basketbollit mes ekipeve Teuta dhe Besëlidhja.
Sipas burimeve, konflikti nisi nga një gjest antisportiv i një lojtari të Teutës, i cili provokoi kundërshtarët dhe tensionoi situatën në parket. Kjo çoi në përplasje mes lojtarëve, për t’u përshkallëzuar me përfshirjen e stafeve teknike nga stolat dhe disa tifozëve në sallë.
Situata doli jashtë kontrollit, duke u shndërruar në sherr mes personave të pranishëm. Forcat e Policisë së Durrësit ndërhynë menjëherë, duke i dhënë fund konfliktit dhe duke shoqëruar disa individë në komisariat për sqarimin e rrethanave.
Mes të shoqëruarve ka lojtarë nga të dyja skuadrat dhe tifozë të dyshuar për pjesëmarrje në sherr. Autoritetet po punojnë për zbardhjen e plotë të ngjarjes.
Nuk ka ende njoftim zyrtar nga Policia e Durrësit, klubet sportive Teuta dhe Besëlidhja, apo Federata Shqiptare e Basketbollit.