Federata e Basketbollit e Kosovës (FBK) ka reaguar të enjten për incidentin e ndodhur të mërkurën mbrëma në palestrën Shani Nushi në Gjakovë, gjatë ndeshjes së Superligës ndërmjet KB Vëllaznimit dhe KB Bashkimit.
Sipas raportit zyrtar të delegatit, në çerekun e dytë u dëgjuan ofendime në kor nga tribuna ndaj klubit mysafir, për të cilat u dha vërejtje zyrtare publikut. Me përfundimin e pjesës së parë, një grup tifozësh të skuadrës vendase tentuan të sulmonin persona në tribunë, duke krijuar rrezik për përshkallëzim. Ndërhyrja e menjëhershme e Policisë së Kosovës parandaloi një incident më të rëndë.
Në të njëjtën kohë, nga tribuna e ballkonit u hodh një shishe plastike e mbushur me ujë, që goditi në fytyrë ndihmëstrajnerin e KB Bashkimit, Bledar Gjeqaj, duke e rrëzuar në parket. Pas këtij akti dhune, në koordinim me gjyqtarët dhe policinë, u morrë vendim për zbrazjen e palestrës nga publiku, përveç zonës VIP, për të garantuar sigurinë.
FBK ka shprehur shqetësim të thellë, duke e cilësuar situatën alarmante, veçanërisht pasi vjen pak ditë pas një incidenti tjetër në Prizren. Federata posedon pamjet filmike dhe ka paralajmëruar zero tolerancë ndaj dhunës, fyerjeve apo sjelljeve të papranueshme.
Policia e Kosovës konfirmoi arrestimin e dy personave për tentim sulmi, ndërsa personi që hodhi shishen është identifikuar dhe priten veprime ligjore ndaj tij. Klubi nikoqir, KB Vëllaznimi, do të ndëshkohet për organizim të dobët, me masa të rënda disiplinore sipas rregulloreve. FBK ka paralajmëruar masa edhe më drastike në rast përsëritjeje, si mbyllje palestraje apo ndeshje pa publik.
Përditësime
Federata e Basketbollit e Kosovës (FBK) dënoi KB Bashkunit për incidentin në Prizren, ku basketbollisti Dardan Berisha u godit dhe pësoi çarje të vetullës.
Klubi u gjobit me një shumë të konsiderueshme dhe u ndalua të luante tre ndeshje si vendas me numër të kufizuar të shikuesve.
FBK deklaroi: "Basketbolli nuk do të tolerojë dhunën. Ne jemi plotësisht të angazhuar për mbrojtjen e sigurisë, integritetit dhe dinjitetit të të gjithë aktorëve në basketboll."