Pas përfundimit të ndeshjes së futbollit ndërmjet KF Rilindja dhe KF Arbëria, e cila përfundoi me rezultatin 3:1, ka pasur përplasje mes pjesëtarëve të dy klubeve. Sipas KF Arbëria, pas ndeshjes, persona zyrtarë të klubit vendas, së bashku me disa tifozë, kanë sulmuar fizikisht pjesëtarë të stafit dhe futbollistë të tyre. Si pasojë, disa prej të dëmtuarve kanë marrë ndihmë mjekësore nga ekipet e Ndihmës së Shpejtë, ndërsa gjendja e tyre shëndetësore raportohet si stabile. Klubi ka kërkuar nga Federata e Futbollit të Kosovës dhe Policia e Kosovës që të hetojnë rastin dhe të ndërmarrin masa ndaj personave përgjegjës.
Në anën tjetër, KF Rilindja i ka mohuar kategorikisht këto pretendime, duke i cilësuar ato si të pavërteta dhe si përpjekje për të njollosur reputacionin e klubit. Sipas versionit të KF Rilindja, pas ndeshjes, trajneri kryesor i KF Arbëria dhe trajneri i portierëve – për të cilin klubi pretendon se nuk ishte i evidentuar në protokollin zyrtar të ndeshjes – janë përfshirë në sjellje konfrontuese ndaj gjyqtarëve. KF Rilindja theksoi se ka ndërhyrë vetëm për të siguruar mbrojtjen e gjyqtarëve, obligim ky që sipas tyre i përket klubit organizator. Klubi ka bërë të ditur se ka iniciuar tashmë hapa institucionalë dhe ligjorë për shpifje dhe deklarime të rreme.
Në vendin e ngjarjes janë parë të pranishëm pjesëtarë të Policisë së Kosovës dhe autoambulanca. Deri më tani, asnjëra nga institucionet përkatëse nuk ka dalë me një njoftim zyrtar për të zbardhur rrethanat e plota të incidentit.