Andrij Shevçenko, ish-sulmuesi i Milanit dhe fitues i Topit të Artë, ka rrëfyer në emisionin e Amazon Prime Video, në shoqëri të Luka Tonios, momentet e penaltisë vendimtare në finalen e Champions League 2003 kundër Juventusit në Mançester.
Ai kujton se gjatë ecjes drejt pikës së penaltiut, Bufoni i dukej gjithnjë e më i madh, ndërsa porta gjithnjë e më e vogël. "I përsërisja vetes të mos e ndryshoja vendimin. E dija si do ta godasja, duhej vetëm të prisja lëvizjen e portierit", tha Shevçenko. Ai kishte analizuar penaltitë e mëparshme kundër Xhixhi Bufonit për të vërejtur lëvizjet e tij dhe priste momentin kur portieri lëshohej.
Sa i përket shikimit ikonik para goditjes, Shevçenko shpjegon: "Po prisja fishkëllimën e arbitrit. Pashë Xhixhin, pastaj arbitrin. Ai fishkëlleu, por unë nuk e dëgjova. Po shikoja majtas e djathtas, sikur të thosha ‘të shkoj apo të mos shkoj?’. Kjo më ndihmoi të fitoja pak kohë dhe të qetësohesha. Pastaj, bam".
Shevçenko shpreh respekt të madh për Juventusin, skuadrën dhe Bufonin, i cili ka bërë një karrierë të jashtëzakonshme. Ditët para finales kishin nervozizëm: Pipo nuk flinte dot, Rino bënte pak rrëmujë, ndërsa ndihej presion i madh. Ndeshja nuk ishte spektakolare, por një betejë e vërtetë, pasi Milani e njihte forcën e kundërshtarit nga ndeshjet e kampionatit.
Fitorja e ndryshoi gjithçka për Milanin, duke e futur në histori. "Tifozët e Milanit duan suksesin, e dinë çfarë do të thotë të fitosh. Mund të jesh një lojtar i madh, por nëse nuk fiton, nuk do të thotë asgjë", nënvizoi ai. Pas ndeshjes, në dhomat e zhveshjes ndihej bosh dhe i lodhur, por festimet në hotel me familjen dhe babanë e kthyen atmosferën.
Ky rrëfim rikthen kujtimet e asaj nate të paharrueshme për historinë e Milanit midis viteve 1999-2006, ku Shevçenko ishte protagonist absolut.