Presidentja e Kosovës, Justina Shiroka Pula, ka udhëtuar më 23 tetor drejt Budapestit, ku do të marrë pjesë në ceremoninë shtetërore për 70-vjetorin e Revolucionit Hungarez të vitit 1956. Kjo është vizita e saj e parë jashtë vendit si presidente. Ajo po zhvillohet me ftesë të homologut hungarez, András Baka.
Gjatë qëndrimit në Budapest, Shiroka Pula pritet të zhvillojë një takim dypalësh me Bakën. Në ceremoninë përkujtimore, presidentja e Kosovës do të jetë mes afro 100 liderëve dhe përfaqësuesve politikë nga vende të ndryshme të botës. Sipas njoftimit të Presidencës, ceremonia shënon një nga momentet e rëndësishme të historisë moderne të Hungarisë dhe përpjekjen e popullit hungarez për liri e pavarësi.
Agjenda e vizitës përfshin edhe një takim me përfaqësues të mërgatës shqiptare që jeton dhe vepron në Hungari.
Revolucioni Hungarez i vitit 1956 ishte kryengritje kundër regjimit komunist dhe ndikimit sovjetik, e shtypur nga ndërhyrja ushtarake sovjetike.
Më 15 tetor 2026, në një pritje të organizuar nga Ambasada e Hungarisë në Kosovë, Shiroka Pula tha: “Populli i Republikës së Kosovës e kupton mirë se çfarë rëndësie ka liria për një komb”.