Gjatë protestës së opozitës para Parlamentit më 24 janar 2026, Shkëlzen Berisha, djali i ish-kryeministrit Sali Berisha, u shfaq mes protestuesve me një shami mbi hundë dhe gojë për t’u mbrojtur nga gazi lotsjellës që policia përdori për të shpërndarë turmën.
Shkëlzen Berisha u pa duke mbështetur qëndrimin e qytetarëve dhe duke marrë pjesë në protestë.
Deputeti i Partisë Demokratike, Klevis Balliu, denoncoi se ndaj protestuesve po hidhet gaz lotsjellës jashtë çdo limiti të lejueshëm. Ai akuzoi efektivët për ushtrim të dhunës shtetërore, duke përmendur se një zonjë u dëmtua në kokë dhe një fëmijë u tërhoq zvarrë. "Është hedhur gaz jashtë çdo limiti të lejueshëm. A thua se jemi në luftë. Të gjithë këta këtu janë me urdhër të Ergys Agasit për të ndaluar qytetarët për protestë. Kjo është dhunë shtetërore. Nuk është parë e dëgjuar të hedhësh gaz në këtë mënyrë. Një zonjë ia kanë çarë kokën, 300 policë të çajnë kokën e një zonje nga dhuna, një fëmijë e kanë marrë zvarrë", tha ai.
Deklarata e Sali Berishës
Më 25 janar 2026, kreu i Partisë Demokratike, Sali Berisha, në një deklaratë për mediat, akuzoi Policinë e Shtetit për ushtrim dhune ndaj qytetarëve gjatë protestës së djeshme dhe për përdorim të gazit lotsjellës të skaduar. Sipas tij, protesta pati një risi të veçantë me pjesëmarrjen masive të të rinjve, të cilët i cilësoi si faktor kyç për rrëzimin e qeverisë.
“Protesta pati një risi themelore: u dominua nga rinia. Është ogur për vendin, sepse ata do ta përmbysin këtë organizatë kriminale. Dje narkopolicia përdori dhunë të egër ndaj protestuesve, goditi me të gjitha mjetet dhe përdori gaz lotsjellës të skaduar, i cili në konventat botërore përbën helm luftarak dhe nuk mund të përdoret. Ky gaz kishte skaduar prej tre vitesh dhe është transformuar në helme që japin dëmtime në sistem dhe mund të shkaktojnë edhe humbjen e shikimit”, u shpreh Berisha. Ai përmendi gjithashtu përdorimin e topave të ujit, goditje me shkopinjë dhe arrestime brutale ndaj protestuesve paqësorë, si dhe urdhra nga Edi Rama, Ergys Agasi dhe Suel Çela.