Ekipi i Shkëndijës nga Tetova ka arritur një fitore vendimtare në ndeshjen e kthimit të zhvilluar në Arenën Kombëtare "Todor Proeski" në Shkup, duke eliminuar ekipin slloven Bravo nga gara evropiane. Pas humbjes në takimin e parë me rezultatin 2-1, skuadra vendase arriti të përmbysë bilancin në favor të saj, duke siguruar kalimin në fazën tjetër.
Sfida nisi me epërsi për mysafirët, pasi Jakoslav Stankovic shënoi për 0-1 në minutën e 17-të. Megjithatë, futbollistët e Shkëndijës reaguan shpejt dhe barazuan rezultatin në minutën e 36-të përmes një autogoli të mbrojtësit Gašper Jovan, pas një topi të harkuar në zonë.
Pjesa e dytë solli një intensitet më të lartë nga vendasit. Në minutën e 50-të, Almir Kryeziu shënoi me kokë pas asistimit të Tambas, duke i dhënë epërsinë skuadrës së tij. Pavarësisht rasteve të shumta, përfshirë goditjet në shtyllë dhe traversë nga Nzenge e Gjorgjievski, goli që vulosi fitoren erdhi vetëm në minutën e 88-të. Marko Gjorgjievski, pas një asistimi nga Trumçi, shënoi me kokë për rezultatin përfundimtar 3-1.
Me këtë sukses, Shkëndija vazhdon rrugëtimin në raundin e tretë kualifikues të Ligës së Konferencës, ku do të përballet me fituesin nga dueli midis Malishevës dhe Hibernian.