Në shkollën e mesme profesionale "Boro Petrushevski" në Shkup, procesi i regjistrimit të nxënësve ka shfaqur vështirësi për paralelet në gjuhën shqipe. Mësimdhënësit u kanë bërë thirrje institucioneve përkatëse që të tregojnë mirëkuptim për shkak të numrit të ulët të nxënësve, i cili nuk përmbush pragun minimal të përcaktuar nga Ministria e Arsimit.
Sipas të dhënave, në dy afatet e para janë regjistruar 164 nxënës, shifër kjo më e ulët se 200 nxënësit e planifikuar. Më konkretisht, në profilet "Komunikacion rrugor" dhe "Shpedicion" janë regjistruar vetëm nga 8 nxënës për klasë. Kjo situatë bie ndesh me vendimin e ministrisë, i cili kërkon një minimum prej 12 nxënësve që një paralele të konsiderohet funksionale.
Kastriot Kasapi, mësimdhënës në këtë institucion, ka deklaruar se nëse nuk ndryshohet qasja e ministrisë, rrezikohet mbyllja e gati tre paraleleve. Ai shtoi se ekziston edhe një afat regjistrimi më 20 gusht, i cili mund të shfrytëzohet për të rritur numrin e të regjistruarve.
Stafi arsimor shpreh shqetësimin se mbyllja e këtyre degëve do të shkaktojë shkurtim të orëve mësimore, duke rrezikuar vendet e punës së mësimdhënësve të lëndëve profesionale, si dhe atyre të lëndëve të përgjithshme, përfshirë gjuhën shqipe, matematikën, anglishten dhe historinë.