Shoqata e Transportit Publik Qytetas, në përfaqësim të operatorëve të transportit publik qytetas, rrethqytetas dhe ndërqytetas, ka kërkuar zgjatjen me tre muaj të periudhës së kompensimit të naftës. Kjo letër u dërgua qeverisë, Ministrisë së Pushtetit Vendor, Ministrisë së Financave dhe Ministrisë së Energjetikës.
Që nga fillimi i konfliktit në Iran, çmimet e karburanteve në Shqipëri mbeten në nivele të larta prej gati tre muajsh. Kjo situatë ka rritur kostot për operatorët e transportit publik, duke i vënë ata në rrezik pamundësie financiare.
Në mbledhjen e fundit të qeverisë u miratua vendimi për dhënien e kompensimit në vlerën 50 lekë për litër naftë, për një afat tremujor nga muaji mars deri në maj. Shoqata kërkon zgjatjen e këtij afati për periudhën korrik-shtator 2026, duke ruajtur të njëjtat procedura, kritere dhe dokumentacion si në aktin normativ aktual.
Në letër theksohet se karburanti përbën një nga kostot kryesore të aktivitetit të transportit publik. Vazhdimësia e çmimeve të larta ka rënduar barrën ekonomike të subjekteve transportuese, duke vështirësuar përmbushjen e detyrimeve financiare dhe garantimin e vazhdimësisë së shërbimit publik ndaj qytetarëve.
Vazhdimi i masës mbështetëse konsiderohet i domosdoshëm për:
- garantimin e vijimësisë dhe stabilitetit të shërbimit të transportit publik;
- shmangien e reduktimit të flotës dhe frekuencave të shërbimit;
- mbrojtjen e interesit qytetar dhe përballueshmërinë e transportit publik;
- ruajtjen e balancës financiare të operatorëve të licencuar të sektorit.
Përditësime
Shoqatat e transportit u takuan më 1 prill me Delina Ibrahimajn, ministre e Ekonomisë, duke kërkuar rikthimin e skemës së 2022-s (100 lekë/litr për 6 muaj).
Shërbimi u pezullua pjesërisht për rreth 2 ditë në Tiranë dhe rrethe, me reduktim flotte deri në 60%.