Shoqata Kombëtare e Gjyqtarëve të Republikës së Shqipërisë dhe Shoqata e Prokurorëve të Republikës së Shqipërisë kanë publikuar një deklaratë të përbashkët më 25 mars 2026, në reagim ndaj referendumit të zhvilluar në Itali për ndryshimet kushtetuese në sistemin e drejtësisë.
Referendumi, i propozuar nga qeveria italiane e kryeministres Giorgia Meloni, u hodh poshtë me votë "Jo" në masën 58,5%. Pjesëmarrja totale ishte 58,9%, ndërsa tek të rinjtë e grupmoshës 18-28 vjeç arriti 67%, me shumicë të qartë pro "Jo". Rezultati shihet si mbështetje për një sistem drejtësie të pavarur dhe funksional.
Në deklaratë, shoqatat shqiptare shprehin vlerësimin dhe urimet për Shoqatën Kombëtare të Magjistratëve të Republikës së Italisë, e cila, sipas tyre, kontribuoi në një debat të hapur për mbrojtjen e parimeve kushtetuese. Ato theksojnë se rezultati dëshmon mbështetje të qartë për pushtetin garantist të shtetit të së drejtës, të siguruar nga një drejtësi e pavarur dhe efikase.
Deklarata vlerëson pjekurinë e magjistraturës italiane në përballjen me sfidat, pavarësinë e fituar përmes sakrificave të mëdha, përfshirë martirët në emër të ligjshmërisë. Roli aktiv i saj në jetën demokratike forcon besimin e qytetarëve tek institucionet.
Shoqatat shqiptare nënvizojnë se sistemi i drejtësisë përbën "oksigjenin" e lirive themelore dhe gur themel i demokracisë. Edhe në Shqipëri, mbetet detyrë e institucioneve dhe magjistratëve për të rritur besimin publik, duke mbrojtur të drejtat kushtetuese. Ato konfirmojnë angazhimin për forcimin e shtetit të së drejtës dhe ndarjes së pushteteve, duke u mbështetur në përvojat evropiane më të mira.
Përditësime
Referendumi italian refuzoi ndryshimet në 7 nenë të Kushtetutës, të lidhura me karrierën e magjistratëve dhe institucionet e drejtësisë.
Nga 20 rajonet italiane, vetëm 3 mbështetën këto ndryshime.