Avokati Altin Goxhaj, 56 vjeç, shoqërohet mbrëmjen e 16 prillit 2026 në ambientet e Komisariatit të Policisë Nr. 2 në Tiranë. Ai u procedua penalisht për veprën penale mosbindje ndaj urdhrit të punonjësit të Policisë së rendit publik.
Ngjarja ndodhi rreth orës 20:00 në rrugën Kavajës. Patrulla e Përgjithshme e Komisariatit Nr. 2 kishte ndaluar për të marrë masa ndaj drejtuesve të automjeteve të parkuara në korsinë e dedikuar. Në atë moment, një automjet taksi, i drejtuar nga shtetasi A. B., 26 vjeç, parkoi pas makinës së policisë.
Punonjësit e policisë iu afruan drejtuesit të mjetit dhe i kërkuan të vazhdojë lëvizjen. Nga taksia doli Altin Goxhaj, i cili, sipas njoftimit të policisë, filloi të ofendojë efektivët. Ai, së bashku me drejtuesin e mjetit, nuk iu bindën urdhrit për të liruar korsinë dhe vazhduar qarkullimin, ndonëse policët ishin në ushtrim të detyrës.
Gjatë shoqërimit në komisariat, Goxhaj vazhdoi të kundërshtojë punonjësit e policisë. Në përfundim të veprimeve të para procedurale, ai u procedua penalisht për veprën e sipërpërmendur.
Drejtoria Vendore e Policisë Tiranë thekson se është e angazhuar për respektimin e lirive dhe të drejtave të qytetarëve, si dhe për zbatimin e detyrave ligjore.