Aktivisti politik në Serbi, Miodrag Kapor, shkaktoi tensione gjatë protestës së mbajtur të shtunën në Novi Sad pasi shpalosi flamurin kombëtar shqiptar mes turmës së protestuesve.
Sapo flamuri u pa nga pjesëmarrësit, situata u tensionua me shtyrje dhe fyerje verbale ndaj Kaporit, i cili u nxorr me dhunë nga turma. Një protestues u shpreh: «Ai e solli flamurin shqiptar këtu për t’u tallur me ne».
Pas incidentit, Kapor deklaroi se kishte dhënë dëshmi në Polici dhe sqaroi se me vete kishte edhe një flamur kroat. «I solla një flamur të Shqipërisë dhe një të Kroacisë. Këta flamuj janë simbole zyrtare të njohura nga Këshillat e Komuniteteve në Serbi. I solla sepse studentët kanë thënë se këta janë flamujt që mund të sillen në protesta», u shpreh ai.
Ai theksoi se qëllimi ishte rritja e tolerancës dhe unitetit mes protestuesve. «Siç e kemi parë edhe më herët, flamuri boshnjak shfaqet rregullisht në protesta. I sollëm këta dy flamuj për të promovuar tolerancën, në mënyrë që të gjithë të jemi bashkë në këtë luftë», shtoi Kapor.
Protestat në Novi Sad zhvillohen nga studentët dhe qytetarët që kërkojnë drejtësi për vdekjen e 16 personave, të cilët humbën jetën vitin e kaluar nga shembja e një strehe në stacionin e trenit. Demonstratat kanë shndërruar në simbol të pakënaqësisë ndaj institucioneve, duke kërkuar përgjegjësi dhe transparencë.