Në seancën fillestare të mërkurën në Gjykatën Themelore në Prishtinë, Shpend Ahmeti u deklarua i pafajshëm lidhur me akuzën se, në cilësinë e kryetarit të Komunës së Prishtinës, nuk e kishte deklaruar saktë pasurinë, përkatësisht mosdeklarimin e 172 mijë e 600 eurove në deponime në para të gatshme.
Deklarimi u bë pas leximit të aktakuzës nga prokurori Dren Paca. Gjykatësi Leon Përlaska njoftoi Ahmetin dhe mbrojtësit e tij, avokatët Bajram Dili dhe Arbër Istrefi, se në afat 30 ditësh kishin të drejtë të paraqisnin kërkesë për hudhje të aktakuzës dhe kundërshtim të provave.
Fillimisht, avokati Arbër Istrefi deklaroi se kishin pranuar shkresat e lëndës, por jo aktakuzën, dhe më pas e pranoi atë nga gjykatësi.
Detajet e Akuzës
Prokuroria Speciale e Republikës së Kosovës (PSRK) e ngriti aktakuzën më 23 dhjetor 2025. Sipas saj, Ahmeti nga viti 2018 deri në vitin 2022, në cilësinë e kryetarit të Komunës së Prishtinës, me dashje kishte paraqitur deklarata të pasakta të pasurisë, duke mos deklaruar deponimet në para të gatshme të realizuara personalisht.
Shuma e përgjithshme e mjeteve të padeklaruara arrin vlerën prej 172.600 euro. Me këtë, akuzohet se ka kryer veprën penale “Mosraportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”.