Një shpërthim i fuqishëm në një fabrikë fishekzjarrësh në zonën e Torano di Borgorose, në provincën e Rietit, rreth 70 kilometra në verilindje të Romës, ka rezultuar fatal për dy persona. Autoritetet italiane konfirmuan se trupat e 30-vjeçarit Simone Cole, punonjës i fabrikës, dhe nënës së tij, Teresa Tocci (60 vjeçe), u gjetën nën rrënojat e objektit. Zjarrfikësit njoftuan se dy punëtorë të tjerë janë plagosur, ndërsa gjendja e tyre shëndetësore mbetet e pasqaruar.
Fabrika, e cila është në pronësi të kompanisë Pirotecnica Mattei, është përfshirë shpesh nga incidente tragjike. Në korrik të vitit 2023, një shpërthim në të njëjtin vend shkaktoi vdekjen e tre personave, mes të cilëve xhaxhai i Simone Cole dhe dy fëmijët e tij. Gjithashtu, në vitin 1983, një ngjarje e ngjashme shënoi gjashtë viktima, përfshirë tre anëtarë të familjes Mattei.
Pronarët e kompanisë, Fabrizio dhe Gaetano Mattei, u dënuan vitin e kaluar me katër vite burg për shkelje të rregullave të sigurisë, përfshirë ruajtjen e lëndëve shpërthyese në ambiente të paautorizuara, punësim të padeklaruar dhe vrasje nga pakujdesia. Pavarësisht këtyre dënimeve dhe historikut të aksidenteve, fabrika kishte rinisur aktivitetin pasi kishte siguruar një licencë të re.
Pas ngjarjes së fundit, Konfederata italiane e sindikatave CGIL ka kërkuar nisjen e një hetimi të plotë. Sindikata ka kërkuar zbardhjen e përgjegjësive për të verifikuar nëse janë zbatuar standardet e kërkuara për sigurinë dhe mbrojtjen e jetës së punonjësve në ambientet e punës.
Përditësime
Autoritetet kanë përfunduar identifikimin e viktimave të shpërthimit në fabrikën e fishekzjarrëve të vitit 2023. Viktimat janë identifikuar si Franco Colle dhe dy fëmijët e tij, Anna dhe Claudio Colle. Gjithashtu, hetuesit kanë saktësuar mbiemrin e Simone Colle, i cili më herët ishte raportuar gabimisht si 'Cole'.