Rreth orës 05:05 të mëngjesit të datës 9 tetor 2026, një shpërthim me lëndë plasëse është regjistruar në lagjen nr. 1 në Bathore, Kamëz. Lënda eksplozive ishte vendosur në murin rrethues të banesës së 55-vjeçarit Xhelal Kurti.
Sipas informacioneve të konfirmuara nga Policia, nga ngjarja nuk raportohen persona të lënduar. Shpërthimi ka shkaktuar dëme materiale në murin rrethues të banesës, si dhe në një automjet të parkuar pranë saj, i cili është në pronësi të djalit të 55-vjeçarit.
Grupi hetimor ka nisur punën për zbardhjen e rrethanave të ngjarjes. Sipas hetimeve paraprake, 55-vjeçari Xhelal Kurti dhe djali i tij nuk rezultojnë të jenë persona me precedentë të mëparshëm penalë. Në deklarimet e tyre të dhëna para hetuesve, babë e bir kanë pohuar se nuk kanë dijeni për motive të mundshme apo identitetin e autorëve të këtij incidenti.
Në kuadër të hetimeve, autoritetet po verifikojnë pistën e biznesit të djalit të 55-vjeçarit, i cili ushtron aktivitetin e tij në fushën e montimit të kamerave të sigurisë. Policia vijon veprimet për identifikimin dhe kapjen e autorëve të këtij sulmi.
Përditësime
Policia po heton aktivitetin e biznesit të kamerave të sigurisë të djalit të pronarit si pistë e mundshme për shpërthimin në Bathore.