Procesi gjyqësor ndaj katër ish-krerëve të Ushtrisë Çlirimtare të Kosovës në Dhomat e Specializuara të Kosovës në Hagë ka hyrë në fazën përfundimtare. Të mërkurën pritet të dëgjohen fjalët e fundit nga përfaqësuesi i viktimave, replikat e mbrojtjes dhe deklarimet përmbyllëse të të akuzuarve.
Në Hagë ndodhet Shqipe Selimi, bashkëshortja e të akuzuarit Rexhep Selimi, bashkë me vëllain e tij. Ajo shprehu mbështetje të plotë për të akuzuarit, duke theksuar se lufta e UÇK-së ka qenë e drejtë.
"Lufta jonë ka qenë e drejtë dhe për këtë arsye jemi sot këtu që t’i dalim në mbështetje katërshen së UÇK-së. Ne shpresojmë që ky verdikt i Gjykatës në fund të jetë në të drejtën e tyre dhe në të drejtën tonë", deklaroi ajo.
Shqipe Selimi cilësoi procesin gjyqësor të padrejtë që nga themelimi. "Kjo gjykatë ka qenë e padrejtë prej fillimit, padrejtësisht është themeluar dhe padrejtësisht po e gjykon Kosovën dhe luftën tonë. Ne si ushtarë qëndrojmë ballëhapur sepse kemi bërë luftë çlirimtare", tha ajo, duke shtuar se pret që gjykatësit ta njohin këtë.
Ajo bëri të ditur se ka komunikuar me bashkëshortin pas kërkesës së Prokurorisë për 45 vite burg për secilin të akuzuar. "Nuk është pritur asgjë e mirë prej kësaj gjykate, mirëpo unë besoj se atë numër të dënimit nuk do ta pranojë gjykata, madje pres që ata të lirohen", u shpreh ajo.
Procesi ka rëndësi jo vetëm për të akuzuarit, por edhe për qytetarët.
Përditësime
Hashim Thaçi, Kadri Veseli, Jakup Krasniqi dhe Rexhep Selimi mbajnë sot fjalimet përmbyllëse në Hagë, secili për 20 minuta. Të akuzuarit janë në paraburgim që nga nëntori 2020 dhe kanë deklaruar mungesë provash. Kryeprokurorja është Kimberly West.