Evis Sala, ministre e Shëndetësisë dhe Mirëqenies Sociale, zhvilloi të shtunën në Romë një takim me presidentin e Istituto Superiore di Sanità (ISS), prof. Rocco Bellantone. Diskutimi u përqendrua në thellimin e bashkëpunimit mes Institutit të Shëndetit Publik (IShP) të Shqipërisë dhe ISS.
Fokusi kryesor ishte forcimi i kapaciteteve laboratorike dhe epidemiologjike, survejanca e sëmundjeve infektive dhe e rezistencës antimikrobiale (AMR), shëndeti mjedisor, si dhe monitorimi i sëmundjeve jo të transmetueshme.
Prioritetet e bashkëpunimit
• Promovimi i qasjes One Health për adresimin e AMR.
• Përmirësimi i sistemeve të monitorimit për sëmundjet kronike dhe faktorët mjedisorë.
• Investimi në programe trajnimi për profesionistët e rinj të shëndetit publik.
Palët ranë dakord për firmosjen brenda pak javësh të marrëveshjes së parë të bashkëpunimit, si hap strategjik për forcimin e sistemeve të shëndetit publik.
Gjatë vizitës, ministrja Sala mori pjesë si eksperte në një event të dedikuar inteligjencës artificiale, ku ishte i pranishëm edhe ministri italian i Shëndetësisë, Orazio Schillaci, së bashku me profesionistë dhe akademikë italianë. Në fjalën e saj, ajo theksoi se inteligjenca artificiale multimodale mundëson integrimin e të dhënave të imazherisë me informacionin klinik dhe gjenomik, duke hapur mundësi për diagnostikim më të saktë dhe vendimmarrje të bazuar në të dhëna.
Ministrja u ndal te modeli shqiptar për përdorimin e inteligjencës artificiale në shëndetësi, duke shpjeguar se po zbatohet ndërlidhja e sistemeve elektronike shëndetësore për të kaluar nga kujdesi i personalizuar drejt politikave dhe ndërhyrjeve në nivel popullate.
Evis Sala ftoi homologun italian Orazio Schillaci për një vizitë zyrtare në Shqipëri dhe rikonfirmoi angazhimin për zbatimin e marrëveshjeve nga mbledhja e parë e përbashkët qeveritare. Dy ministrat u ndalën edhe te rezultatet e para të bashkëpunimit në fushën e onkologjisë.