Që nga e premtja, 1 maji, Shqipëria dhe Kosova kanë rikthyer zyrtarisht regjimin e kalimit pa kontrolle kufitare për automjetet me targa të dy vendeve. Kjo masë do të jetë në fuqi deri më 30 shtator dhe synon të lehtësojë lëvizjen gjatë sezonit veror, kur fluksi i udhëtarëve rritet ndjeshëm.
Sipas marrëveshjes, automjetet me targa shqiptare dhe kosovare kalojnë në pikat kufitare pa ndalesa dhe pa procedurat standarde të kontrollit. Ndërkohë, mjetet me targa të huaja i nënshtrohen vetëm kontrolleve të shpejta për të shmangur vonesat dhe radhët e gjata, veçanërisht në pikën Morinë–Vërmicë.
Ky lehtësim rikthehet pas një periudhe dy mujore ndërprerjeje, gjatë marsit dhe prillit, kur u zbatuan kontrolle të plota kufitare. Edhe në atë kohë, fundjavat dhe festat zyrtare u shoqëruan me regjim të thjeshtuar për qytetarët e Shqipërisë dhe Kosovës.
Ky bashkëpunim ka sjellë përfitime të dukshme ndër vite, sidomos në verë, duke nxitur turizmin, vizitat familjare dhe shkëmbimet tregtare.
Sipas të dhënave zyrtare, vetëm në orët e para të ditës së premte kanë hyrë në Shqipëri rreth 15-20 mijë qytetarë, shumica nga Kosova.
Përditësime
Protokolli lehtësues vlen për 9 muaj në vit, i ndarë në dy sezone: verë (1 maj–30 shtator) dhe dimër (1 nëntor–28 shkurt).
Zbatohet në të gjitha pikat e përbashkëta të kalimit kufatar.
1 maji, ditë pushimi, sjell fluks të lartë në Morinë nga qytetarë kosovarë për fundjavë.