Shqipëria do t’i nënshtrohet pas 12 vitesh një Programi të plotë Vlerësimi të Sektorit Financiar (FSAP), të realizuar bashkërisht nga Fondi Monetar Ndërkombëtar dhe Banka Botërore.
Anke Weber, shefe e misionit të Fondit Monetar Ndërkombëtar për Shqipërinë, deklaroi në një intervistë për gazetën "Monitor" se vlerësimi do të zhvillohet gjatë vitit 2026. Ky program do të analizojë në mënyrë të thelluar qëndrueshmërinë e sektorit financiar ndaj goditjeve, do të identifikojë cenueshmëritë e fshehura dhe do të vlerësojë efektivitetin e rregullimit dhe mbikëqyrjes financiare.
Programi FSAP, i themeluar në vitin 1999, përbën një vlerësim gjithëpërfshirës të sektorit financiar të një vendi. Në ekonomitë e zhvilluara, ai kryhet nga FMN-ja, me fokus në qëndrueshmërinë e sektorit, cilësinë e kuadrit rregullator dhe mbikëqyrës, si dhe kapacitetin për menaxhimin e krieve financiare. Në ekonomitë në zhvillim, si Shqipëria, realizohet së bashku me Bankën Botërore.
Bazuar në gjetjet, programet FSAP prodhojnë rekomandime mikroprudenciale, makroprudenciale dhe për nevojat e zhvillimit, të përshtatura me rrethanat specifike të vendit.
Ky vlerësim vjen në një moment kur Shqipëria ka avancuar në procesin e integrimit europian. Vitet në vazhdim do të jenë të rëndësishme për përafrimin e plotë të kuadrit ligjor dhe rregullator me standardet e Bashkimit Europian.
Në fund të vitit të kaluar, guvernatori i Bankës së Shqipërisë, Gent Sejko, paralajmëroi se në periudhën 2026-2027 kuadri ligjor dhe rregullator i sektorit bankar do të përafrohet plotësisht me atë europian. Ai theksoi nevojën për mirëkuptimin dhe bashkëpunimin e industrisë bankare, në mënyrë që ndryshimet të adoptohen drejt dhe përfitimet të materializohen sa më shpejt.